حكاية من حكايات ستي ....
زمان وانا طفلة كنا بنروح نزور جدتي لامي
كانت هادية اوي وجميلة جمال من النادر انك تشوفه ،
وكانت دايما تحكيلي حكايات وانا قاعدة جنبها وسانده عليها أو حاطه راسي في حجرها
وفي مرة ستي قالتلي
اللي يدق بابك يسمع جوابك
قلت لها : ماسمعتش الباب دق ياتيتة
ضحكت ستي وقالتلي .....
الباب ماحدش دق . .. ده
متل(يعني مثال) منقول عن الأجداد يا لولو
لما حدا بيرمي كلام وبيزعل الناس منه ..
بيضطروا يردوا عليه بكلام مش حلو ويزعلوه زي ما زعلهم ،
قلت لها: عشان كده انت ياتيتة مابتتكلميش كتير ..
وحتى الضيوف لما بتيجي عندنا ، بتفضلي مبتسمة وبتسمعي كلامهم ومش بتحكي معاهم كتير ،
ضحكت ستي وقالت لي :
مش بحب الكلام الكتير و الحكي الفاضي ..
كمان كتر الكلام بجيب يا حبيبتي كتير من مشاكل
قلت لها : بس انا بحب اسأل كتير
وبحب حكياتك اوي يا تيته.
و احكيلي ايه كمان عندك عن الباب والبواب من أمتال زمان ؟؟
لان عجبني اوي اللي (يدق الباب يسمع الجواب ) ،
قالتلي: خدي دي كمان عندك ،
ببقولوا : (أبواب مغلقة وهموم مفرقة)
قلت لها : حلو بس معناه ايه ياتيتة مش فاهمه !؟
قالتلي : ده مثل بيقولوا عليه
لانه كل عيلة قافلة عليها بابها
وماحدش بيعرف ايه هي همومها
ولا ايه اللي صابها ،
كل عيلة عندها مشاكل بس ماحدش يعرفها ،
عجبني اوي المثل ده ..
ومن ساعتها لما اروح على اي مكان
أبص دايما
على ابواب البيوت وأفتكر الامثال بتاعت ستي اللي حكتلي عليها زمان
اللي يدق الباب يسمع الجواب
ابواب مغلقة ..وهموم مفرئة
الله يرحمك يا تيته
حتى باب بيتنا بقيت انتبة له و ابص علي شكلة ..
وابواب الجيران
كل بوابه وراها قصة وحكاية
وياما حكايات كتير وهموم ومشاكل مايعلم بيها غير أصحابها و رب العالمين
احلى ابواب ابواب بيوت اهالينا
ابواب زمان
لان اصحاب البيوت دي عندهم حنية ودفئ بتكفي الناس كلها
الله يرحمك يا ايتها انت وجدو
ويرحم امي وابي
اقفلوا ابوابكم
لكن الباب الوحيد اللي بيفضل مفتوح هو باب الاهل
مش ممكن انسى كلامك ابدا يا تيته
ولا ذكرياتنا في بيت العيلة بيتنا القديم
وكل باب وراه قصة
وكل باب وراه حكاية
وربنا وحده العالم بكل واحد حكايته ايه .......
بقلم /
دكتورة لبني يونس
تعليقات
إرسال تعليق